Efta ćhave ko Beogradi marenape djivdipaske, sebepi taro phare djivdipaske uslovija!
Ki teritorija tari Srbija ko agorutne bish bersh sine po buderi taro 150 milje bare jaga. Duj rromane beshipaske thana „Salvatore“ ko Bujanovac thaj „Vrela ribnichka“ ki Podgorica thabile but sigate. Milja manusha aćhile bizo khanchi. Ko vakti taro 2012-2015 bersh ko naformalna beshipaske thana sine po buderi bare jaga ano kola o djivdipa nashavdja 12 ćhave.
Ko 593 beshipaske thana, premalo phenipa tari Strategija bash socijalno ikljuchipa taro Rroma thaj Rromnja tari Guverna tari Srbija taro 2016 dji 2025.djivdini 70 procentija tari rromani populacija. Em neve podatkija phenena kaj 32.843 manusha kola tane mapirime ko telo standardoske beshipaske thana naje olen shaipa te ovol olen chisto pani, dji ko 93.050 manusha naje olen kanalizacija , a dji ko 24.104 manusha kola djivdinena ko akala thana naje olen struja.
12.03.2021.bersheste ko 17h, afta ćhave dukhavdile sebepi eksplozija ko Galipojsko drom, ko beogradesko beshipasko than Čhukarica. Taro olende efta, shtar isi olen but phare dukhavdipa, phmdle ki Univerziteski ćhavorengi bolnica ki Tirshova. Premalo anglune informacije, o čhave khelenaj pe ko gunoja, telal o dalekovod, thaj sar so phenen o manusha kola dikhle, khuvdja olen i struja taro dlekovod. Sherutno taro foro Beograd Zoran Radojichich, gelo ki bolnica te dikhol sar tane o čhave. „ Efta ćhave tane ki bolnica phare dukhavdipaja, dezhurno ekipa kerola sa so shaj ko lengoro sastariba. Dikhljum olen , em importantno so e ćhaven dikhena shukar doktorija, thaj sare keren pli buti, pachav kaj sa ka ovol shukar“, pheol o Radojichich.
Akava beshipasko than vizitindja 13.03.2021.bersheste em poslaniko Dragoljub Ackovich thaj ćlano taro Nacionako saveti e rromengo Sonja Mitrovich Lukich thaj kerdje lafi e manushencar, ko puchipa da li khoni alo ki olende khoni taro institucije, on phendje kaj na sine olen nisavo azhutipa. Palo odova o rajo Ackovich rodindja taro manusha kola djivdinena ko odova beshipasko than spisko e anavencar aro manusha kola djivdinena odothe te shaj olenge azhutinolpe. Ko akava snimko shaj dikholpe kaj olengere improvizuime barake thabile sa, thaj itanipa odothe naje! Valjanol panda te phenolpe kaj anglal jek kurko ano akava than thabilo panda 9 barake, khoni na ramosardja taro odova.
Sa amende but dukhavdja akava so ulo e ćhavenge ko beshipasko than Ćukarica, o saveti ka kerol sa so shaj amalikane avere institucijencar te bashi svako famlija azhutinolpe. Akava tano panda jek opomena te valjanol po buderi te den pe thajra ko beshipaske thana te kerol pe po shukar shaipa basho djivdipa sar ne bi ovenaj adjahar situacije. Amen djanaja kaj baro gendo taro rromano amalipa djivdinela phare thaj baro gendo taro olende djivdinena ko bashipaske thana ano kola naje olen struja, thaj odova sebepi avola dji na bah thaj bare jaga. Ko amalipa rashtarake institucijencar ka kera sa te akala tragedije ko avutnipa te na oven, phenol rajo Nakich bashi amari produkcija.
Panda 2016.bersheste Liga Roma phenolaj basho akala bare problemija ro rromane beshipaske thana, numa na sine shukar gndipa tari rashtra.
Maj anglal valjanol te djangavdjol profesionalno puchipa taro urbanistija, sektori basho navaktesere situacije thaj lokalno samouprave, kola premalo Hakaj valjanol te ikerol briga basho manusha thaj te organizuinol sistemi taro jagako arakhipa, tari aver rig importantno te o rroma ko beshipaske thana valjanol te oven sikavde so te keren kana avol dji e bari jag ko beshipaske thana, phenol rajo Osman Balich.
Liga Roma anglal o 5 bersh kerdja em jek edukativno film tari akaja phari buti koja ovola ko rromane beshipaske thana.
“Keriba taro akava teksti shaisarda EUROPEAN endowment for democracy. Gndipa thaj ramosardipa ko akava teksti sikavena gndipa taro autori ko projekti „ Dodatna podrška EU medijima u Srbiji tokom pandemije COVID-19 – Podrška Roma World“ thaj na sikavi gndipa taro EUROPEAN endowment for democracy.“
